„ლელოს“ ინიციატივასთან დაკავშირებით ირაკლი ქადაგიშვილმა განაცხადა, რომ ვერ ხვდება, რას გულისხმობს პარტია „ლელოს“ ინიციატივა რუსული აგრესიის მხარდამჭერი სიმბოლიკის აკრძალვასთან დაკავშირებით.
“ჩვენს ასო-ბგერაში და ანბანში Z და V სხვანაირი ფორმის არის და დაგვანებონ თავი Z და V ლათინური სიტყვებიდან ამოვიღოთ? ფილმი “ზორო” აღარ გავუშვათ თუ რა ვქნათ? ვერ გავიგე, რა უნდა გავაკეთოთ, რაში ვიყენებთ ამ Z-ს და V-ს. მე ასე მიმაჩნია, რომ არ ვიცი ზუსტად რას გულისხმობს ეს Z და V-ს გამოყენება. არსებობს საერთაშორისო ბრენდები, სადაც Z და V ასე თუ ისე გამოყენებულია. აქედან გამომდინარე, ამ ასოს გამოყენება არ ვიცი როგორ უნდა ავკრძალოთ. არ ვიცი ზუსტად, ამიტომ ვერ გაგცემთ პასუხს”. – განაცხადა საპროცედურო საკითხთა და წესების კომიტეტის თავმჯდომარე ირაკლი ქადაგიშვილმა.
“ლელოს” წევრებმა პარლამენტში გამართულ ბრიფინგზე ახალი ინიციატივა გააჟღერეს, რომელიც წმინდა გიორგის ლენტის, ასევე Z- და V სიმბოლოების გამოყენების აკრძალვას გულისხმობს. მათი განცხადებით, სიმბოლოების გამოყენება დასჯადი უნდა გახდეს.
