რუსების თავდასხმას თავშესაფარზე ლუგანსკში 60-მდე ადამიანი ემსხვერპლა

ლუგანსკის ოლქის სამხედრო ადმინისტრაციული ხელმძღვანელი, სერჰი ჰაიდაი ამბობს, რომ თავშესაფარში, რომელიც ერთ-ერთი სკოლის შენობაში იყო მოწყობილი, რუსების დაბომბვამ, სავარაუდოდ, 60-მდე ადამიანი იმსხვერპლა. რუსები სკოლას თავს 7 მაისს დაესხნენ, სადაც თავს 90 ადამიანი აფარებდა. 27 მათგანი გადარჩა. 2-ის ცხედარი ნაპოვნია. დანარჩენების ძებნა გრძელდება, თუმცა, ძალიან მცირე შანსია, რომ ცოცხლები იყვნენ. მისივე განცხადებით, აფეთქება შენობის შიგნით მოხდა. სამაშველო სამუშაოები მთელი ღამის განმავლობაში გრძელდებოდა. სერჰი ჰაიდაიმ ასევე აღნიშნა, რომ დღეს, 8 მაისს ბრძოლები ლუგანსკის რამდენიმე ფრონტზე გრძელდება, მათ შორის, ბილონორივკაში, ვოევოდივკასა და რუბიჟნეში. რაც შეეხება სოფელ პოპსანას – აქ რუსებმა 11 სახლზე საარტილერიო თავდასხმა მიიტანეს, სადაც მოქალაქეები სარდაფებში იმალებოდნენ. მაშველები ცდილობენ, ადგილები ნანგრევებისგან გაწმინდონ. სერჰი ჰაიდაისვე თქმით, პოპასნაში უკრაინულმა არმიამ უკან დაიხია და უკვე გამაგრებულ პოზიციებზე განლაგდა.