▪️ გაეროს ადამიანის უფლებათა უმაღლესი კომისრის ოფისმა (OHCHR)უკრაინაში რუსეთის სრულმასშტაბიანი შეჭრის შემდეგ 2072 მშვიდობიანი მოქალაქის დაღუპვა დააფიქსირა.
▪️ ეროვნული უსაფრთხოებისა და თავდაცვის საბჭოს მდივანმა, ალექსეი დანილოვმა განაცხადა, რომ დილით რუსმა ოკუპანტებმა შეტევის მეორე ეტაპი დაიწყეს. „ჩვენი ჯარები უძლებენ. მხოლოდ ორ ადგილზე შეძლეს გამაგრება – კრემინა და კიდევ ერთი პატარა ქალაქია. ბრძოლა გრძელდება. ჩვენ არ დავთმობთ ჩვენს ტერიტორიებს“.
▪️ კანადა გეგმავს ევროპაში სამხედრო ჰოსპიტალის შექმნას, რომელიც უახლოეს მომავალში უკრაინელებს სამედიცინო დახმარებას გაუწევს.
▪️ რუსეთის ჯარებმა გაანადგურეს 10 სახლი და ოლიმპიური საწვრთნელი ბაზა ლუგანსკში, რომელთა უმეტესობა კრემინაში მდებარეობს, რომელიც მტერმა 18 აპრილს დაიპყრო, იქ სულ მცირე ოთხი მშვიდობიანი მოქალაქე დაიღუპა.
▪️ ოკუპანტებმა სავარაუდოდ გაიტაცეს ხერსონის ყოფილი მერი ვოლოდიმირ მიკოლაიენკო. მეუღლის თქმით, ის 16 საათზე წავიდა და შემდეგ გაუჩინარდა, მას შემდეგ ის არ დაკავშირებია. მიკოლაიენკოს არაერთხელ მიუღია მუქარა პრორუსებისგან.
▪️ ზაპოროჟიას რეგიონში რუსეთის ფედერაციის საოკუპაციო ძალების მიერ მშვიდობიანი მოსახლეობის გატაცების 155 შემთხვევა დაფიქსირდა. 86 მძევალი უკვე გაათავისუფლეს, კიდევ 69 ადამიანი ისევ ტყვეობაში რჩება.
