ჩაერთვება თუ არა ოპოზიცია ევროკომისიის 9 დათქმის შესრულების პროცესში? მმართველ გუნდში აცხადებენ, რომ ოპოზიცია ისევ “საბოტაჟის” გზას გააგრძელებს და ქვეყნის ევროპულ მომავალზე წინ საკუთარ პარტიულ ინტერესებს დააყენებს.
თანამშრომლობისთვის მზად არის ოპოზიციის ნაწილი. ისინი მხარეებს კომპრომისისკენ მოუწოდებენ და აღნიშნავენ, რომ “ევროკავშირის გზაზე სიარული”, ოპოზიციისა და ხელისუფლების ერთობლივი თანამშრომლობის გარეშე, შეუძლებელია. მეორე ნაწილი კი პროცესში ჩართვას მხოლოდ მაშინ აპირებს, თუ მმართველი გუნდი მათ მიერ შეთავაზებულ წინადადებებს განიხილავს.
“ნაციონალური მოძრაობის” წევრის, დავით კირკიტაძის განცხადებით, მზად არიან, მონაწილეობა მიიღონ საერთაშორისო პარტნიორების რეკომენდაციაზე მუშაობის პროცესში, იმ შემთხვევაში, თუ რეალურად გადაიდგმება ნაბიჯები და თუ არ იქნება “თვალში ნაცრის შეყრის” მცდელობა.
“ის პროცესი, რომელიც ითვალისწინებს რეალურად შესრულებას, იმ რეკომენდაციების, რომელიც არის ჩვენი პარტნიორების მხრიდან, ჩვენი მხრიდან, რა თქმა უნდა, ჩართულობა იქნება, ოღონდ უნდა იყოს რეალურად გადადგმული ნაბიჯები და არა მოჩვენებითი, ან თვალში ნაცრის შეყრა, როგორიც აქამდე ჰქონდა “ქართულ ოცნებას”, – განაცხადა დავით კირკიტაძემ.
