განათლების სამინისტროსთან მოშიმშილე პედაგოგმა, მაია ეკალაძემ შიმშილობა შეწყვიტა.
პედაგოგის განცხადებით, შიმშილობის შეწყვეტის მიუხედავად პროტესტი მაინც გაგრძელდება. აქციის მონაწილეები ამ დრომდე რჩებიან განათლების სამინისტროსთან.
“პროტესტის მიზეზი გახდა დირექტორების სასერტიფიკაციო გამოცდა და მასზე არსებული დანაშაულები, საჭიროა ამ დანაშაულების გამოძიება. ჩვენ თვითონ სტრუქტურისგან ვითხოვდით ამას ამდენი თვის განმავლობაში და ეს აუცილებლად მოხდება, აუცილებლად განხორციელდება. პროტესტი შიმშილობით აღარ გაგრძელდება, რადგან კაციჭამიას წინ არ დავუდგებით და არ ვეტყვით შეგვჭამეო, მაგრამ პასუხები უნდა მივიღოთ სამინისტროსგან. დემოკრატიული პროცესები ასე მარტივად არ უნდა იშლებოდეს საგანმანათლებლო სისტემაში მაინც”, – ამბობს მაია ეკალაძე.
შიმშილობის შეწყვეტის გადაწყვეტილება მასწავლებელმა მას შემდეგ მიიღო, რაც იგი გუშინ, 6 დეკემბრის ღამეს, შეუძლოდ გახდა.
