პრეზიდენტის ვებგვერდი, სავარაუდოდ, დაჰაკეს. President.ge ამ დროისთვის გათიშულია. ადმინისტრაციას ჯერ კომენტარი მომხდართან დაკავშირებით არ გაუვრცელებია.
საქართველოს პრეზიდენტის ოფიციალურ ვებსაიტზე – president.ge ჰაკერული თავდასხმა განხორციელდა. ინფორმაცია თავდაპირველად გავრცელდა ტელეგრამ-არხებით.
სავარაუდოდ, თავდასხმა განხორციელდა რუსული ჰაკერული ჯგუფის მიერ. საიტზე შესულ ადამიანებს ხვდებოდათ წარწერა: “დაჰაკულია COZY BEAR-ის მიერ, დიდება რუსეთს”.
COZY BEAR ჰაკერების რუსული ჯგუფია, რომელიც, დასავლური დაზვერვის სამსახურის ცნობით, ФСБ-ს ხელმძღვანელობით მოქმედებს.
რადიო თავისუფლების სატელეფონო ზარებს არ უპასუხეს პრეზიდენტის პრესსამსახურში. შინაგან საქმეთა სამინისტროდან დამატებითი ინფორმაციის მიღების შემთხვევაში, მასალა განახლდება.
ახლა პრეზიდენტის ოფიციალური საიტი გათიშულია, მასზე შესვლა შეუძლებელია და ასევე წაშლილია ჰაკერების დატოვებული ტექსტი.
ჰაკერული თავდასხმის შესახებ იუწყებოდნენ ტელეკომპანიები “ფორმულა” და “მთავარი არხი”.
ეს არ არის პირველი შემთხვევა, როცა ქართულ ვებსაიტებზე კიბერული შეტევა ხორციელდება. ერთ-ერთი ყველაზე დიდი თავდასხმა მოხდა 2019 წელს. მათ შორის თავდასხმა განხორციელდა პრეზიდენტის ვებსაიტზეც.
