პრეზიდენტმა სალომე ზურაბიშვილმა Deutsche Welle-სთან ინტერვიუში განაცხადა, რომ საქართველოს პრობლემაა არა მხოლოდ „რუსულ კანონი“, არამედ – „რუსულ ხელისუფლება“, რომელიც რუსეთისკენ ცვლის ქვეყნის საგარეო პოლიტიკურ კურსს.
„ახლა ძალიან ნათელია, რომ ეს კანონი [„აგენტების კანონი“] თავისი შინაარსით რუსული კანონია, რადგან ამ გზით რუსეთმა შეძლო რეალურად ჩაეხშო სამოქალაქო საზოგადოება, რასაც [საქართველოს] ხელისუფლება აქ ცდილობს. ის ცდილობს, რომ საქართველოს პარტნიორები წარმოადგინოს რევოლუციის აგენტებად, რომ ისინი ხელისუფლების დამხობას ცდილობენ და ძალიან ჩუმად არიან რუსეთთან მიმართებით, თითქოს ის დღეს ჩვენი მეგობარია.
სულ უფრო ნათელი ხდება, რომ პრობლემაა არა მხოლოდ რუსული კანონი, არამედ პრობლემაა რუსული ხელისუფლება – ხელისუფლება, რომელიც დათმობებზე მიდის რუსეთთან და ატრიალებს ქვეყნის ორიენტაციას რუსეთისკენ. ეს არის ის, რასაც ამ ქვეყნის უდიდესი ნაწილი აპროტესტებს“, – განაცხადა სალომე ზურაბიშვილმა „დოიჩე ველესთან“ ინტერვიუში. ის ამბობს, რომ საპროტესტო აქციის მონაწილეების აღქმით, დღეს საქართველოში ევროპის მომავლის ბედიც წყდება.
საქართველოს პრეზიდენტის თქმით, ის ვეტოს ადებს ნებისმიერ კანონს, რომელიც არ შეესაბამება საქართველოს ევროინტეგრაციის გზაზე განსაზღვრულ მიზნებს.
სალომე ზურაბიშვილმა რამდენიმე კვირის წინ განაცხადა, რომ ვეტოს დაადებს “ქართული ოცნების” მიერ კვლავ ინიციირებულ “აგენტების კანონს”. საპარლამენტო უმრავლესობას პრეზიდენტის ვეტოს დაძლევა შეუძლია.
