საქართველოს სახელმწიფო საგარეო ვალი მაისის მდგომარეობით 8.7 მილიარდ დოლარამდე გაიზარდა – ამის შესახებ ფინანსთა სამინისტროს მიერ გამოქვეყნებული ანგარიშიდან ირკვევა. დოკუმენტის თანახმად, მაისში საგარეო ვალის მოცულობა აპრილთან შედარებით 46 მილიონი დოლარით გაიზარდა, რაც ძირითადად ახალი საინვესტიციო პროექტების მიმართულებით დონორებისგან თანხების ჩამორიცხვებს უკავშირდება.
საქართველოს მთავრობა საგარეო ვალებს ძირითადად მსხვილი ინფრასტრუქტურული პროექტების დაფინანსებისთვის იღებს, მათ შორის ყველაზე ძვირად ღირებული პროექტებია აღმოსავლეთ-დასავლეთის მაგისტრალი, ასევე ჩრდილოეთი სამხრეთის დამაკავშირებელი ახალი მაგისტრალი. საერთაშორისო დონორები თანხებს ასევე გამოყოფენ ქვეყნის რეგიონული განვითარების პროექტების, და ბიუჯეტის მხარდამჭერი კრედიტების მიმართულებითაც.
საქართველოს ძირითადი ვალი შემდეგ ქვეყბებთან/ორგანიზაციებთან აქვს:
| კრედიტორი | ვალის მოცულობა აშშ დოლარში |
| აზიის განვითარების ბანკი (ADB) | 2,256,326,000 |
| მსოფლიო ბანკის ჯგუფი | 2,082,196,000 |
| ევროპის საინვესტიციო ბანკი (EIB) | 1,116,086,000 |
| საფრანგეთი | 767,114,000 |
| გერმანია | 605,052,000 |
| მთავრობის ევრობონდი | 500,000,000 |
| სებ-ის ვალი IMF-ის მიმართ | 393,091,000 |
| ევროპის რეკონსტრუქციისა და განვითარების ბანკი (EBRD) | 224,328,000 |
| აზიის ინფრასტრუქტურის საინვესტიციო ბანკი (AIIB) | 211,780,000 |
| მთავრობის ვალი IMF-ის მიმართ | 194,560,000 |
| ევროკავშირი (EU) | 143,895,000 |
