საქართველოს პრეზიდენტი სალომე ზურაბიშვილი ფეისბუკის გვერდზე გამოქვეყნებულ პოსტში „სამარცხვინოს“ უწოდებს პარტია “ქართული ოცნების” დეპუტატის, ბექა ოდიშარიას განცხადებას ოკუპირებულ აფხაზეთში უკანონოდ დაკავებული საქართველოს მოქალაქეების შესახებ.
21 აგვისტოს პარლამენტში მედიასთან საუბარში დეპუტატმა ბექა ოდიშარიამ შესაბამისი კითხვის პასუხად განაცხადა, რომ „თუ ადამიანი დაკავებული იყო ფულის აღებ-მიცემობით, რომ ადამიანებს გადაეკვეთათ ეს ხელოვნური საოკუპაციო ადმინისტრაციული საზღვარი, ბუნებრივია, ამ ადამიანს, სამწუხაროდ, ხელი შეუწყვია იმისთვის, რომ ის დაეკავებინათ“, თუმცა ოდიშარიას სიტყვებით, მათ პასუხი უნდა აგონ „არა აფხაზეთის მარიონეტული რეჟიმის წინაშე და/ან რუსული საოკუპაციო ჯარის წინაშე, არამედ ის დაუყოვნებლივ უნდა გადმოცემულ იქნეს საქართველოსათვის, საქართველოს ლეგიტიმური ხელისუფლებისთვის, რომელიც, ვფიქრობ, გაერკვევა საკითხში. მე უდანაშაულობის პრეზუმფციას დავიცავდი, არ დავადანაშაულებდი ამ ადამიანს, იმიტომ რომ ჩემთვის რუსული საოკუპაციო ჯარის პრესსამსახური და ან აფხაზეთის დღევანდელი მოქმედი მარიონეტული რეჟიმი ვერ იქნება ავთენტური წყარო. ამიტომ, როგორც კი ეს ადამიანი მოხვდება ქართველი სამართალდამცველების ხელში, ვფიქრობ, მყისიერად გაირკვევა ჭეშმარიტება“.
საქართველოს პრეზიდენტი სალომე ზურაბიშვილი წერს, რომ „საერთოდ უდანაშაულობის პრეზუმფცია არ იცოდე რას გულისხმობს და უარესი კიდევ ეგრეთწოდებული სამართალდამცველების ბრალდებებს უაპელაციოდ იზიარებდე … ეს როგორც სჩანს ოცნების მიერ გაგებული ოკუპანტებთან სამომავლო ურთიერთობების დალაგების ხედვაა … რისთვისაც თურმე საკონსტიტუციო უმრავლესობა სჭირდებათ!”
