წინა ოთხი წელიწადი იყო სირთულეებითა და გამოწვევებით სავსე ოთხი წელიწადი. ამ ოთხი წლის განმავლობაში ჩვენ გამოვიარეთ რევოლუციის ორი მცდელობა, გამოვიარეთ ჩვენი ეკონომიკის ჩამოშლის მცდელობა, ჩვენი ქვეყნის ომში ჩათრევის მცდელობა, თუმცა ჩვენი ერთიანობით მოვახერხეთ და ყველა გამოწვევა დავძლიეთ, შევინარჩუნეთ მშვიდობა და 40 მილიარდი ლარით გავზარდეთ ამ ოთხი წლის განმავლობაში ქვეყნის ეკონომიკა, – ამის შესახებ საქართველოს პრემიერ-მინისტრობის კანდიდატმა, ირაკლი კობახიძემ პარლამენტში განაცხადა.
როგორც კობახიძემ აღნიშნა, ეს ყველაფერი იყო გუნდის ერთიანობის, გუნდის სიმყარის შედეგი.
„მინდა, ვისარგებლო ამ შემთხვევით და თითოეულ თქვენგანს გადაგიხადოთ მადლობა ამ ერთიანობისთვის, ერთად ბრძოლისთვის, სწორედ ამ ბრძოლის შედეგია ის მიღწევები, რაც ჰქონდა ჩვენს ქვეყანას გასული ოთხი წლის განმავლობაში. დღეს საქართველო არის სუვერენული და ძლიერი, როგორც არასდროს და ეს არის თითოეული თქვენგანის დამსახურება. რა თქმა უნდა, ჩვენ უნდა ვიზრუნოთ ჩვენი ქვეყნის განვითარებაზე, არიან ადმაიანები ჩვენს ქვეყანაში, რომლებიც ამტკიცებენ, რომ თუ მივიღებთ მაგალითად კანონს არასამთავრობო ორგანიზაციების გამჭვირვალობის შესახებ, მეორე დილით ვიღვიძებთ ჩელიაბინსკში, საოცარი თეზისი არსებობს, არიან ადამიანები, რომლებიც ამტკიცებენ, რომ თუ მივიღებთ ამ კანონს, ძაღლს საქართველოში ერქმევა „საბაკა“ და იგივე მიმართულებით არიან ადამიანები, რომლებსაც ჰგონიათ, რომ თუ გაიხსნება მოლაპარაკებები ევროკავშირთან, ხვალ გავიღვიძებთ ბრიუსელში, არა თბილისში, საქართველოში, არამედ ხვალ გავიღვიძებთ ბრიუსელში და ძაღლს ერქმევა არა ძაღლი, არამედ მაგალითად, „დოგ“ ან რაიმე ამდაგვარი. რაც უნდა მოხდეს, გარწმუნებთ, რომ ჩვენ აუცილებლად ვიცხოვრებთ ამ ქვეყანაში. ჩვენ ვიზრუნებთ ამ ქვეყანაზე, ამ ქვეყანაში ძაღლს ექმევა ძაღლი, ადამიანს ერქმევა ადამიანი, ამ აქვეყანას ერქმევა ქვეყანა და სახელმწიფოს ერქმევა სახელმწიფო, ეს არის ჩვენი პასუხისმგებლობა საქართველოს წინაშე“, – განაცხადა ირაკლი კობახიძემ.
