თბილისის საქალაქო სასამართლოში პოლიციელზე თავდასხმაში ბრალდებულების, თემურ ზასოხაშვილისა და დავით ლომიძის სასამართლო პროცესი მიმდინარეობს. მათ ე.წ. მოლოტოვის კოქტეილის სროლას ედავებიან.
სხდომას ესწრება მხოლოდ თემურ ზასოხაშვილი. რაც შეეხება დავით ლომიძეს, ის პროცესში ჯანმრთელობის მდგომარეობიდან გამომდინარე, გლდანის მე-18 სამკურნალო დაწესებულებიდან დისტანციურად მონაწილეობს.
დღევანდელ სასამართლო პროცესზე პროკურატურის 4 მოწმე მისცემს ჩვენებას, მათ შორის არიან ექსპერტები და პოლიციელები.
ცნობისთვის, დავით ლომიძე და თემურ ზასოხაშვილი 2024 წლის 1-ელ დეკემბერს დააკავეს. პროკურატურის ინფორმაციით, ისინი ღამის საათებში, თბილისში, პარლამენტთან მიმდინარე საპროტესტო აქციის დროს, ჭიჭინაძის ქუჩაზე თავს დაესხნენ განსაკუთრებულ დავალებათა დეპარტამენტის თანამშრომლებს და მათ ე.წ. მოლოტოვის კოქტეილები ესროლეს. ასევე, აღნიშნული ქმედების შედეგად ცეცხლი წაეკიდა შინაგან საქმეთა სამინისტროს ბალანსზე არსებულ წყლის ჭავლის სპეციალურ ავტომანქანას.
მათ ბრალდება საქართველოს სისხლის სამართლის კოდექსის 353-ე პრიმა მუხლის პირველი ნაწილით (პოლიციელზე თავდასხმა პოლიციელის სამსახურებრივ საქმიანობასთან დაკავშირებით) წარედგინათ, რაც სასჯელის სახედ და ზომად 4-დან 7 წლამდე თავისუფლების აღკვეთას ითვალისწინებს.
