ჩვენს ევროპელ კოლეგებთან საუბარი გვქონდა იმაზე, რომ სამწუხაროდ, დღემდე ევროკავშირის ოფიციალურ დოკუმენტებში ოკუპაციას არ ჰქვია ოკუპაცია და მნიშვნელოვანია ზუსტადაც, რომ ევროკავშირმა სწორი სახელი დაარქვას ამ მდგომარეობას, – ამის შესახებ საქართველოს პარლამენტის თავმჯდომარე შალვა პაპუაშვილმა, აღმოსავლეთ პარტნიორობის საკითხებში ევროკავშირისა და ევროკავშირის წევრი ქვეყნების სპეციალური წარმომადგენლების დელეგაციასთან შეხვედრის შემდეგ განაცხადა.
მისი თქმით, ხელისუფლება არის პასუხისმგებელი იმაზე, რომ არსებული უსაფრთხოების რისკების რეალიზება, რეალობად ქცევა არ მოხდეს. პაპუაშვილის განცხადებით, რისკები როდესაც რეალიზდება, თავისთავად ნებისმიერი ხელისუფლება ამ მხრივ პასუხისმგებლობას სხვადასხვა დონეზე უნდა გრძნობდეს.
ჟურნალისტის კითხვაზე – ოკუპაციაზე საუბრისას რა შუაშია წინა ხელისუფლება, როცა მთელი ცივილიზებული სამყარო ამბობს, რომ რუსეთი არის ოკუპანტი და ყველა ინტერვენციას იწყებს თავად, პაპუაშვილმა განაცხადა, რომ ამას ამბობს ცივილიზებული სამყარო, საქართველო და საქართველოს ხელისუფლებაც.
„ცივილიზებული სამყარო და უპირველეს ყოვლისა, ამას ამბობს საქართველო და საქართველოს ხელისუფლება. სხვათა შორის, ჩვენს ევროპელ კოლეგებთან ახლაც საუბარი გვქონდა იმაზე, რომ სამწუხაროდ, დღემდე ევროკავშირის ოფიციალურ დოკუმენტებში ოკუპაციას არ ჰქვია ოკუპაცია და მნიშვნელოვანია ზუსტადაც, რომ ევროკავშირმა სწორი სახელი დაარქვას ამ მდგომარეობას.
უსაფრთხოების მხრივ გამოწვევები და რისკები არსებობს ახლა, არსებობდა უწინაც და ჩვენი პასუხისმგებლობა, ხელისუფლების პასუხისმგებლობა ყოველთვის მიემართება. სხვა ხელისუფლებებსა და სხვა ქვეყნებზე ჩვენ ვერ ვიქნებით დამოკიდებული. უპირველეს ყოვლისა, ჩვენი ქვეყნის ხელისუფლება არის პასუხისმგებელი იმისთვის, რომ ის უსაფრთხოების რისკები, რაც არსებობს, ამ უსაფრთხოების რისკების რეალიზება, ანუ რეალობად ქცევა არ მოხდეს. ამას უზრუნველყოფს „ქართული ოცნება.“ მაშინ, როდესაც ორი რეგიონი ოკუპირებულია და რუსეთის რეგულარული არმია იმყოფება საქართველოს დედაქალაქიდან რამდენიმე კილომეტრში, ეს არის უდიდესი რისკები. მთავარი ამოცანა არის, რომ ამ რისკების რეალიზების შესაძლებლობა არ მივცეთ არავის როგორც შიდა ინსტრუმენტებით, ისე გარე ინსტრუმენტებით. მთავარი ამოცანა ნებისმიერი ხელისუფლების, ეს არის ქვეყნის უსაფრთხოების უზრუნველყოფა. შესაბამისად, ხელისუფლების პასუხისმგებლობა არის, რომ არსებული რისკების რეალიზება არ მოხდეს. რისკები როდესაც რეალიზდება, თავისთავად ნებისმიერი ხელისუფლება ამ მხრივ პასუხისმგებლობას სხვადასხვა დონეზე უნდა გრძნობდეს“, – განაცხადა პაპუაშვილმა.
