თბილისის “დინამოს” ახალგაზრდა ფორვარდი ვახტანგ სალია “ნიუკასლში” გადადის, – ამის თაობაზე ექსკლუზიურ ინფორმაციას “ლელოს” ავრცელებს. გამოცემის ცნობით, უკვე გადაწყვეტილია, თბილისის “დინამოს” 17 წლის ფეხბურთელის “პრემიერ ლიგის” კლუბში გადასვლა.
“შევიტყვეთ, რომ კონტრაქტი ხანგრძლივ თანამშრომლობას ითვალისწინებს. გარდა ამისა, მისი ოფიციალურად გაფორმების შემდეგ, სალია ერთი სეზონის განმავლობაში ისევ “დინამოში” დარჩება და ამის შემდეგ შეუერთდება “ნიუკასლს”.
ცხადია, დავინტერესდით, ხომ არ იქნება სალიას ტრანსფერის შემთხვევაში ხელისშემშლელი ის გარემოება (მკაცრი ინგლისური რეგულაციების გათვალისწინებით), რომ მას არ უთამაშია ეროვნულ ნაკრებში, მაგრამ გვითხრეს, რომ ეს თემა მოგვარებულია.
ინგლისური კლუბი ახალგაზრდა ფორვარდზე ძალიან დიდ იმედს ამყარებს. “ნიუკასლი” გვარიანად გაძლიერდა მას შემდეგ, რაც კლუბში ახალი და ძალიან სოლიდური ინვესტორი მივიდა”, – წერს გამოცემა.
აქამდე, ქართველ ფეხბურთელთაგან ” ჯორდების” შემადგენლობაში თემურ ქეცბაიას და ზურაბ ხიზანიშვილს უთამაშიათ. ცოტა ხნის წინ იყო ლაპარაკი “ნიუკასლში” გიორგი მამარდაშვილის ტრანსფერზეც, თუმცა საბოლოოდ ის “ლივერპულმა” დაიბევა.
სალია 2007 წლის 30 აგვისტოს, თბილისში დაიბადა. მისი სიმაღლე 1.81 მეტრია. ქართველი ფეხბურთელი თბილისის “დინამოს” საფეხბურთო აკადემიის აღზრდილია და ძირითადი გუნდის გარდა, თამაშობს 17-წლამდელთა ნაკრებშიც.
ა.წ. გაზაფხულზე ბრიტანულმა HITC-მა გაავრცელა ცნობა, რომ ვახტანგ სალიათი, რომელიც მთელ მსოფლიოში ერთ-ერთ ყველაზე პერსპექტიულ ჭაბუკ ფეხბურთელად მიიჩნევა, “არსენალი” და “მანჩესტერ სიტი” იყვნენ დაინტერესებული.
სტატიაშია ასევე აღნიშნული იყო, რომ ქართველ ვუნდერკინდს ხვიჩა კვარაცხელიას ადარებენ და მას აგრეთვე “ჩელსი”, “ტოტენჰემი”, “ლივერპული”, “მანჩესტერ იუნაიტედი”, “ნიუკასლი” “რეალი”, “ატლეტიკო”, “ბარსელონა”, პსჟ, “ბაიერნი” და “დორტმუნდი” აკვირდებოდნენ.
