ფოთის საკრებულოს სხდომაზე ხმაური იყო. ხმაური მოჰყვა ოპოზიციონერი დეპუტატების მიერ მოწყობილ პერფორმანსს. მათ სხდომის დაწყებამდე ბანერი გაშალეს, რომელზეც თბილისში აქციებზე დაშავებული ადამიანების ფოტოები იყო გამოსახული.
საკრებულოს ოპოზიციონერმა წევრებმა ძალადობა დაგმეს და იქ მყოფებს სოლიდარობისკენ მოუწოდეს.
ოპოზიციის ამ ქმედებას უმრავლესობის გაღიზიანება მოჰყვა, ისინი პროვოკაციაში დაადანაშაულეს. დეპუტატები ერთმანეთს სიტყვიერად დაუპირისპირდნენ.
ხმაურისა და დაპირისპირების შემდეგ ოპოზიციონერმა დეპუტატებმა სხდომა პროტესტის ნიშნად დატოვეს და საპროტესტო ბანერი მერიის შენობის გარე ფასადზე გააკრეს.
„სათქმელი ძალიან ბევრი მაქვს, ახალგაზრდები არიან და მინდოდა მიმეწოდებინა მათთვის, რომ საფლავში ნუ ჩაჰყვებიან ბიძინა ივანიშვილს. ბიძინა ივანიშვილი და თავისი ხროვა მთლიანად გაცდენილია კონსტიტუციას და ჯალათებად არიან ქცეული. დაასახიჩრეს ადამიანები, სისხლის გუბეებად აქციეს რუსთაველი და ამის ფონზე კიდევ ნაცვლად იმისა, რომ მორიდება იქონიონ, დასცინიან საზოგადოებას. ხალხის მოთხოვნა არის პირველ რიგში ჩატარდეს ხელახალი კანონიერი არჩევნები და გათავისუფლდნენ პოლიტიკური პატიმრები. არ შეწყდება ეს პროტესტი, სანამ მიზანს არ მივაღწევთ. საკრებულოს სხდომაზე არც ვაპირებდი გაჩერებას, უბრალოდ, მინდოდა, რომ ეს პერფორმანსი გამეკეთებინა, იქნებ გულთან ახლოს მისულიყო ახალგაზრდების დასისხლიანებული სახეები, მაგრამ პირიქით, აგრესიაზე გადმოვიდნენ. ესენი „ტიტუშკები“ არიან და არა საკრებულოს წევრები“, – განაცხადა დარეჯან ცხვიტარიამ.
