“2 საათია ველოდი მიხეილ სააკაშვილთან შეხვედრას, თუმცა ამის საშუალება არ მომეცა ძალიან ბანალური მიზეზით – „ზემოდან” ამის ნებართვას უნდა დაველოდოთ.სამწუხაროდ, პენიტენციური სამსახური მუშაობს ისე, როგორც ქართული ბიუროკრატია“,-ამის შესახებ მიხეილ სააკაშვილის ერთ-ერთმა ადვოკატმა, შოთა თუთბერიძემ კლინიკა „ვივამედთან“ ჟურნალისტებთან საუბრისას განაცხადა.
ადვოკატმა აღნიშნა, რომ სააკაშვილს ბევრი მნახველი ჰყავს.
„ქართული სახელმწიფოს სახედ იქცა „ზარი ზემოდან”, როდესაც ვიღაცის კაცის კაცმა უნდა დარეკოს, რომ კანონით კუთვნილი უფლება გამოიყენო. სამწუხაროდ, პენიტენციური სამსახური მუშაობს ისე, როგორც ქართული ბიუროკრატია, ანუ ცუდად და გაჭიანურებულად. წინასწარ აღებული წერილობითი თანხმობების პირობებში მე და პარლამენტის ერთ-ერთი წევრი ველოდებით ვიღაცის დარეკვას პენიტენციური სამსახურიდან ან რომელიმე სხვა ჩინოვნიკისგან იმისთვის, რომ საბადრაგო სამსახურს მიეცეს შესაძლებლობა, რომ შეგვიშვან.
სამწუხაროა, რომ პენიტენციურმა სამსახურმა თვეების განმავლობაში ვერ მოახერხა, რომ დაელაგებინა სისტემა. ეს არის სახე იმისა, თუ როგორ მუშაობს ქართული ბიუროკრატია. ის ორიენტირებულია მხოლოდ ხელოვნური ბარიერების შექმნაზე. იმედი მაქვს, რომ ეს პრობლემა აღმოიფხვრება, რადგან ეს არის სირცხვილი, თუმცა იმ ზიანს, რომ დაცვის ქვეშ მყოფის მონახულებას ვერ ვახერხებთ, ვერაფერი შეცვლის”, – განაცხადა შოთა თუთბერიძემ.
