რამდენიმე დღის წინ იტალიურ პრესაში გავრცელდა ინფორმაცია, რომ “იუვენტუსი” ზაფხულში “ნაპოლის” სპორტული დირექტორის, კრისტიანო ჯუნტოლის გადაბირებას ეცდება.
Areanapoli-ს ცნობით, სეზონის ბოლოს “პარტენოპეის” პრეზიდენტის, აურელიო დე ლაურენტისის მთავარი საზრუნავი სწორედ 51 წლის საფეხბურთო სელექციონერის შენარჩუნება იქნება.
“ჯუნტოლიმ ყველას დაუმტკიცა, რომ ნამდვილი პროფესიონალია. “ნაპოლის” წარმატებაში ერთ-ერთი მთავარი წვლილი მიუძღვის, რადგან არაერთი ნიჭიერი მოთამაშე აღმოაჩინა. აურელიო დე ლაურენტისი მის გაშვებას არ განიხილავს და კრისტიანოსთვის ახალი გაუმჯობესებული კონტრაქტის შეთავაზებას გეგმავს”, – წერს გამოცემა.
ჯუნტოლის “პარტენოპეის” სპორტული დირექტორის პოსტს 2015 წლიდან იკავებს. “ნაპოლისთან” მისი კონტრაქტი 2024 წლის ზაფხულში იწურება.
