რუსეთის ქალაქ ვოლგოგრადის ყველა ძირითად შესასვლელში საგზაო ნიშნები წარწერით: „ვოლგოგრადი“ დროებით შეცვალეს „სტალინგრადით“. ამის შესახებ კრემლის მიერ კონტროლირებული სააგენტო „ინტერფაქსი“ წერს ქალაქის მერიის პრესსამსახურზე დაყრდნობით.
მიზეზად დასახელებულია მეორე მსოფლიო ომის დროს, სტალინგრადის ბრძოლაში გამარჯვების მე-80 წლისთავი, რომელსაც 2 თებერვალს აღნიშნავენ. ვოლგოგრადში ელოდებიან რუსეთის პრეზიდენტ პუტინს.
ვოლგოგრადის საქალაქო დუმის მიერ 2013 წელს მიღებული გადაწყვეტილებით, ვოლგოგრადი დროებით სტალინგრადი ხდება წლის განმავლობაში 10-ჯერ. მაგალითად, „სამშობლოს დამცველთა დღეს“ – 23 თებერვალს და „გამარჯვების დღეს“ – 9 მაისს.
დღევანდელ ვოლგოგრადს, რომელიც ბოლშევიკურ რევოლუციამდე ცარიცინი იყო, სტალინგრადი 1925 წელს, სტალინის პატივსაცემად დაარქვეს. სტალინის კულტთან ბრძოლის კამპანიის ფარგლებში, 1961 წელს, საბჭოთა კავშირის უმაღლესი საბჭოს პრეზიდიუმის ბრძანებით, სტალინგრადს ვოლგოგრადი ეწოდა.
