9 მარტს, ღამით, ბელიაშვილის ქუჩაზე ერთ-ერთ რესტორანში ცეცხლსასროლი იარაღიდან ნასროლი ტყვიები საცხოვრებელი კორპუსის ფანჯრებს მოხვდა.
„ფორმულას” ინტერვიუ მისცა იმ სახლში მცხოვრებმა მოქალაქემ, რომლის ფანჯარაც ტყვიამ ჩაამსხვრია. მისი თქმით, 5-ჯერ გაისროლეს.
„ჩვენ ვცხოვრობთ ბელიაშვილზე, წისქვილის, თეატრის რესტორნების პირდაპირ. ვცხოვრობთ მე-16 სართულზე. სამზარეულოში მოხვდა ტყვია და ჩვენ მისაღებში ვიყავით. თავიდან ფეიერვერკის ხმა გვეგონა, მაგრამ მეხუთე გასროლის ხმა არ იყო, საშინელი მსხვრევის ხმა იყო”. – თქვა მან.
სხვა მოქალაქემ „ტვ პირველთან” თქვა, რომ მხოლოდ ფანჯრები ჩაიმსხვრა და არავინ დაშავებულა.
შსს-ის ცნობით, გამოძიება დაიწყო სისხლის სამართლის კოდექსის 236-ე მუხლის მე-3 ნაწილით, რაც ცეცხლსასროლი იარაღის (გარდა გლუვლულიანი სანადირო თოფისა), საბრძოლო მასალის, ფეთქებადი ნივთიერების ან ასაფეთქებელი მოწყობილობის მართლსაწინააღმდეგო დამზადება, გადაზიდვა, გადაგზავნა ან გასაღებას გულისხმობს.
უწყება მომხდართან დაკავშირებით სხვა დეტალებს არ ავრცელებს.
