უკრაინა არ დათანხმდება გაყინულ კონფლიქტს, – ამის შესახებ უკრაინის პრეზიდენტის ადმინისტრაციის ხელმძღვანელმა, ანდრეი ერმაკმა განაცხადა.
„ჩვენ ძალიან მკაფიოდ ვაცხადებთ, რომ არ დავთანხმდებით გაყინულ კონფლიქტს. ჩვენ ნამდვილად წინააღმდეგი ვართ და ამ საკითხში ჩვენი პოზიციები ამერიკელი პარტნიორების პოზიციას სრულად ემთხვევა. ისინიც წინააღმდეგი არიან კონფლიქტის გაყინვის, ისინი წინააღმდეგნი არიან ე.წ. მინსკი 3-ის, ან რამე შეთანხმებების, როგორიც იყო ბუდაპეშტის მემორანდუმი. სამწუხაროდ, ვერცერთმა მათგანმა ვერ იმუშავა. ყველა აცნობიერებს ამას. ყველამ გააკეთა თავისი დასკვნები“, – განაცხადა ერმაკმა.
ამასთან, ერმაკმა ისაუბრა ევროპის როლის შესახებ აშშ-ის მონაწილეობით უკრაინასა და რუსეთს შორის მოლაპარაკებების პროცესში.
„ეს შეხვედრა, ვფიქრობ, იყო ძალიან წარმატებული. მაგრამ ეს მხოლოდ დასაწყისია. ჩვენ წინ დიდი სამუშაო გვაქვს. მთავარია, რომ უკრაინა არ არის მარტო, უკრაინა პარტნიორებთან ერთად არის. ასევე, ჩვენს ევროპელ პარტნიორებთან მუდმივ კონტაქტში ვართ. ჩვენ ვაწვდით მათ ინფორმაციას იმის შესახებ, თუ რა ხდება“, – აღნიშნა ერმაკმა.
