“მოქალაქეთა პოლიტიკური გაერთიანებების შესახებ” კანონში შესატანი ცვლილებების განხილვას, პარლამენტი მიმდინარე კვირიდან დაიწყებს. ცვლილებების მიხედვით, პოლიტიკური პარტიები იურიდიული პირებისგან ფინანსური შემოწირულობების მიღებას ვეღარ შეძლებენ, იურიდიულ პირებს კი პარტიებისთვის შემოწირულობების გაცემა აეკრძალებათ.
ცვლილება დეოლიგარქიზაციის სამოქმედო გეგმის ნაწილია, რომელიც ეუთო/ოდირისა და ვენეციის კომისიის რეკომენდაციის საფუძველზე შემუშავდა.
კანონპროექტის ინიციატორები „ქართული ოცნების“ წევრები არიან. საპარლამენტო უმრავლესობაში აცხადებენ, რომ ამ საკითხზე ოპოზიციის დამოკიდებულებით გაირკვევა, აპირებენ თუ არა ისინი 9 დათქმაზე მმართველ გუნდთან თანამშრომლობას.
„მივიღეთ გადაწყვეტილება, რომ, ერთი მხრივ, მოხდეს იურიდიული პირების მიერ პარტიების დაფინანსების აკრძალვა, ასევე, განისაზღვროს ჭერი მთლიანად ბიუჯეტიდან პარტიების დაფინანსების. რეკომენდაცია ჩვენი ევროპელი კოლეგების მხრიდან გახლავთ გაცემული, რომლის შესახებ საუბარიც ადრეც მიმდინარეობდა პოლიტიკურ ჭრილში. ეს წესი შეეხება აბსოლუტურად ყველა პარტიას, მათ შორის – მმართველსაც და ოპოზიციისაც,“ – განაცხადა დავით მათიკაშვილი.
უკვე ცნობილია, რომ ოპოზიციის ნაწილი ცვლილებებს მხარს არ დაუჭერს.
