პარლამენტის თავმჯდომარე შალვა პაპუაშვილი ევროპარლამენტის მიერ მიღებულ რეზოლუციას რეალობას აცდენილს უწოდებს და ამბობს, რომ ეს “პირადი ბრაზის” გამოხატულებაა.
“სამწუხაროდ, ეს არ არის პირველი შემთხვევა, როდესაც ევროპარლამენტი იღებს რეზოლუციას საქართველოსთან დაკავშირებით და რომელიც, სამწუხაროდ, აცდენილი არის ხოლმე რეალობას, პრაგმატიზმს, რაციონალიზმს. ასეთი ტიპის პწკენები უფრო ტოვებს ხოლმე ისეთ აღქმას, რომ ეს არის გარკვეული პირადი ვენდეტა, ბრაზი, რომელიც უნდათ, რომ გამოხატონ რეზოლუციის სახით. ზოგიერთი ამ დეპუტატებისგან ცოტა ხანში, ალბათ, აღარც იქნებიან ევროპარლამენტში. ისინი დაბრუნდებიან საკუთარ ქვეყნებში, მშვიდად გადაბრუნდებიან და დაიძინებენ. ასეთი თავქარიანი დამოკიდებულება საქართველოს მიმართ ჩვენთვის მიუღებელია, ამიტომ რამე განსაკუთრებულ დატვირთვას ჩვენ ასეთ რეზოლუციას არ ვაძლევთ”, – ამბობს პაპუაშვილი.
